مش كل النصيب بيبقي مناسب وحلو ومش كله بيبقي وحش وبلاء
النصيب ده اختبار في الحياه عامل زي سؤال صح وغلط كده
ممكن يجيلك سؤال غلط ولازم تجاوب بغلط لو جاوبت علي سؤال غلط بصح هتخسر الدرجه
بالظبط زي العكس لما تجاوب بغلط علي سؤال صح بتخسر برضو الدرجه
زي مثلا لما يجي لانسان ابتلاء بالمرض فده ب
يبقي نصيب سيء مينفعش الانسان يقول لا دا نصيب حلو وانه يقبله وخلاص وميسعاش انه يتعالج لازم الانسان يرفض المرض ويسعي للعلاج
مينفعش لو واحده ربنا ابتلاها بزوج سيء مثلا تقول دا نصيبي بقي وتكمل لا طبعا لازم ترفض الوضع لانه ابتلاء واي نوع ابتلاء ونصيب سيء بنمر بيه لازم نعرف انه غلط ونعالجه ونشوفله حلول لان لو متصرفناش وكملنا بالابتلاء وخلاص منغير حلول هيستمر الاذي والابتلاء هيطول وهنخسر
والعكس ممكن يجي للانسان رزق حلو ونصيب حلو والانسان يرفضه ويضيع الفرصه وبعد كده يخسر ويندم. 🤷
لازم نفهم كويس ان مهما كان محدش يعرف اي السؤال الي المفروض تجاوب بغلط عليه لانه ابتلاء واي السؤال الصح الي لو جاوبت عليه صح هتكسب
ربنا بس هو الي مطلع وعارف اختبار كل انسان ومحدش اختباره زي التاني ابدااااا
والي عليه يبحث ويعرف انهي سؤال هيجاوب عليه بغلط او صح دا الشخص نفسه
وان مهما حاولت تساعده وتغششه ازاي يجاوب في اختباره دا ميضمنش ابدا ان مساعدتك ليه صح للشخص ده
وان في الاخر الشخص ده سواء وهو بيجاوب من نفسه ولا انت الي وجهته انه يجاوب بالاجابه دي علي اعتقادك انها الصح هو المسؤل والي هيتحمل نتيجه اختياره
بالظبط زي ما الشيطان بيوسوس لينا بالمعصيه واحنا الي لو اتبعناه وسمعنا كلامه واختارنا بنائا علي توجيهه هنخسر واحنا الي مسؤلين ومش هيشفعلنا ولا حجه لينا ابدا ولا شماعه نعلق خطأنا علي ان حد من بره وجهنا لكده .
لازم نفهم ان الانسان القوي هو الي بيفكر وبيسعي لاختياره
ومهما العالم كله وقفوا ضده علشان يختار علي مزاجهم هما حاجه هو مش شايفها صح ليه
مبيستسلمش وبيختار الصح حتي لو صعب جداااا والعالم كله شايف انه غلط ويفضلوا يلوموه ويضغطوا عليه ويصعبوا عليه .
والانسان الضعيف هو الي بيستسلم للاختيارات السهله الي مفهاش تعب وخلاص ومبيتعبش نفسه انه يفكر في امتحانه ويجاوب الاصح اصلا .
وحتي لو الانسان عنيد واختار يجاوب سؤال صعب وجاوبه غلط في النهايه وكل الي نصحوه بيلوموه انه مسمعش كلامهم
فهو حر هو اختباره هو وهو يتحمل نتيجه اختياره برضو .
لازم نبقي فاهمين ان الموضوع بين الانسان وربه في الاول والاخر وان ده اختبار محدش مطالب انه يفهمه غير ربنا والشخص نفسه
والموضوع بيفكرني بقصه سيدنا الخضر لما اتي اليه موسي وشافه وهو بيخرم السفينه وبيقتل ولد وبيبني جدار في القريه الي محدش فيها رضي ياكلهم وكل شويه موسي يضايق ويقوله الخضر لن تستطع معي صبرا وفهمه في الاخر ان كل الي عمله حاجات اسبابها يعلمها بينه وبين ربنا
والي انت شايفه مش منطقي ده وغلط كان صح ودي اسبابه بس انت معندكش القدره تستوعبها .
وان ده في الاخر ميخصكش .
ومن هنا نفهم كويس ان الموضوع نسبي وان ربنا وحده الاعلم بكل حاجه وان ربنا بيحط اختبارات لينا حتي لو فيها اسئله صعبه لازم نجتهد ونجاوبها صح حتي لو هنتعب في التفكير فيها والاجابه عليها وان مينفعش نستسلم وخلاص لتوجيه غيرنا وهما مهما كانوا عمرهم مهيقدروا يفهموا ذاتك وحياتك الي ربنا خلقك فيها ولا ظروفك مهما كانوا اقرب الناس ليك مش هيحسوا بيك ولا يفهموك قد ربنا الي خلقك ومطلع علي تفكيرك ومشاعرك كامله وهو الي حاططلك الاختبار المناسب ليك اصلا
بقلم / نوران بهاء الدين صابر
